អ្នកនាំភ្ញៀវទេសចរនៅខេត្តសៀមរាបទទូចឲ្យអាជ្ញាធរជាតិអប្សរាបើកទ្វារឲ្យភ្ញៀវចូលទស្សនាតំបន់ប្រាសាទអង្គរវត្តឲ្យបានពីព្រឹកព្រលឹម ដើម្បីបញ្ចៀសការកកស្ទះតាមដងផ្លូវ និងដើម្បីសម្រួលដល់ភ្ញៀវដែលចង់ទៅទស្សនាប្រាសាទនៅពេលព្រឹក។ ការទទូចនេះដោយសារតែអ្នកទេសចរជាច្រើននាក់បានត្អូញត្អែរនឹងការបើកទ្វារយឺតយ៉ាវ ដែលបណ្ដាលឲ្យពួកគាត់មិនអាចចូលទៅទស្សនាប្រាសាទនៅពេលព្រលឹមបាន។
អ្នកនាំភ្ញៀវទេសចរទៅកម្សាន្តនៅតំបន់ប្រាសាទអង្គរវត្តខេត្តសៀមរាបលោក ចាប តុងហាន់ ឲ្យដឹងនៅថ្ងៃទី២៤ មិថុនា ថា ភ្ញៀវទេសចរអន្តរជាតិ ជាពិសេសទេសចរមកពីតំបន់អឺរ៉ុបភាគច្រើនចង់ទៅទស្សនាព្រះអាទិត្យ រះ នៅតំបន់ប្រាសាទអង្គរវត្តឲ្យបានមុនគេ ដើម្បីគយគន់សម្រស់ធម្មជាតិនៅពេលព្រឹកព្រលឹមពីប្រាសាទបូរាណខ្មែរ ប៉ុន្តែមិនអាចចូលទៅទស្សនាបាននោះទេ ដោយអាជ្ញាធរជាតិអប្សរាបើកទ្វារឲ្យទេសចរចូលនៅម៉ោង៧កន្លះឯណោះ។
លោក ចាប តុងហាន់ អះអាងទៀតថា ការបើកនៅម៉ោង៧កន្លះនេះ ធ្វើឲ្យអ្នកទេសចរជាច្រើននាក់ក្នក់ចិត្ត ព្រោះមានធ្វើដំណើរតាមដងផ្លូវកកស្ទះ ហើយមានសំឡេងអ៊ូអរដែលបណ្ដាលឲ្យបាត់សម្រស់លក្ខណធម្មជាតិរបស់ប្រាសាទ៖ «ហើយប្រទេសយើងមិនមែនទេសចរលេខ១នោះទេ ព្រោះនៅប្រទេសថៃគេមានអ្នកទេសចរដល់ទៅ៣០លាននាក់ណោះ ហើយយើងបន្តិចបន្តួចគ្រាន់តែសាងភាពល្អ ហើយឲ្យបានពីព្រលឹមតិចទៅ ហើយម្យ៉ាងដើម្បីឲ្យបុគ្គលិកគ្នាបានសម្រេចពីព្រឹកផង»។
ចំណែកអ្នកនាំភ្ញៀវទេសចរនៅខេត្តសៀមរាបម្នាក់ទៀត ថ្លែងថា មួយរយៈចុងក្រោយនេះ អ្នកទេសចរអន្តរជាតិតែងត្អូញត្អែរប្រាប់ពួកគាត់ស្ទើរគ្រប់គ្នា អំពីការបើកទ្វារនៅតំបន់ប្រាសាទអង្គរវត្តយឺតយ៉ាវនេះដែរ។ មគ្គទេសក៍រូបនេះ អះអាងទៀតថា អ្នកទេសចរដែលមានលុយកាត់មួយចំនួន ចង់ស្នាក់នៅខេត្តសៀមរាបច្រើនថ្ងៃ ដើម្បីគយគន់សម្រស់ធម្មជាតិនៅពេលព្រលឹមនិងពេលថ្ងៃលិច ក៏ប៉ុន្តែដោយសារតែ ការបើកទ្វារយឺតយ៉ាវនេះធ្វើឲ្យទេសចរមួយចំនួនបានកាត់បន្ថយការស្នាក់នៅខេត្តសៀមរាប ហើយខ្លះបានចាកចេញពីកម្ពុជា ទៅកម្សាន្តនៅប្រទេសផ្សេងក្នុងតំបន់អាស៊ានវិញក៏មាន។ មគ្គទេសក៍រូបនេះបន្ថែមថា សព្វថ្ងៃអ្នកទេសចរបានជំរុញឲ្យពួកគាត់នាំចូលទៅទស្សនាប្រាសាទតាំងម៉ោង៦ព្រឹក ប៉ុន្តែមិនអាចចូលទៅគយគន់នៅក្នុងប្រាសាទបានទេ ដោយសមត្ថកិច្ចបិទទ្វារជាប់ បណ្ដាលឲ្យទេសចរត្រូវឈរចាំរហូតដល់ម៉ោង៧កន្លះទើបសមត្ថកិច្ចបើកទ្វារឲ្យភ្ញៀវចូល៖ «ដល់អីចឹងឲ្យខាតប្រយោជន៍ខាតពេលវេលាយើង។ ពួកអឺរ៉ុបគេចូលចិត្តកន្លែងណាស្ងាត់ ហើយខ្ញុំគិតថាប៉ះពាល់អារម្មណ៍ពួកគាត់ដែលឈរចាំយូរ ហើយពួកគេអាចនឹងមើលងាយដល់ប្រព័ន្ធគ្រប់គ្រងតំបន់អង្គររញ៉េរញ៉ៃ។ ម្យ៉ាងវិញទៀតនៅតំបន់ នឹងប៉ូលិសគាត់នៅយាមរហូត មិនមែនអត់មានអ្នកយាមប្រចាំការនៅទីនោះឯណា»។
អគ្គនាយករងអាជ្ញាធរជាតិអប្សរា លោក សុខ សង្វា មិនទាន់ប្រតិកម្មជុំវិញនឹងការឡើងនេះនៅឡើងទេ ដោយលោកប្រាប់ថាជាប់រវល់ប្រជុំ ហើយអាស៊ីសេរីក៏បានទូរស័ព្ទទៅលោកជាច្រើនដងទៀតដែរ តែពុំមានអ្នកទទួល។
មន្ត្រីស៊ើបអង្កេតសមាគមការពារសិទ្ធិមនុស្សអាដហុក (Adhoc) ប្រចាំខេត្តសៀមរាប លោក សួស ណារិន មានប្រសាសន៍ថា លោកមិនទាន់ទទួលព័ត៌មាននេះច្បាស់នៅឡើយទេ ប៉ុន្តែលោកអះអាងថា ប្រសិនបើករណីនេះកើតឡើងពិតនឹងធ្វើឲ្យប៉ះពាល់ដល់សតិអារម្មណ៍របស់អ្នកទេសចរជាពុំខាន៖ «ប៉ុន្តែបើសិនជាតំបន់ខ្លះដែលគេមានការហាមឃាត់យើងគួរតែសាកសួរមើល តើហេតុអីបានជាគេហាមឃាត់មិនឲ្យចូលពីព្រឹកអីចឹង ពីព្រោះពីមុនមកវាអត់ដែលមាន»។
របាយការណ៍ក្រសួងទេសចរណ៍ឲ្យដឹងថា រយៈពេល ៤ខែ ដើមឆ្នាំ២០១៨ កម្ពុជាទទួលបានភ្ញៀវអន្តរជាតិជាង ២ លាននាក់ (២,១០០,០០០) កើនឡើង ប្រមាណ១៣ភាគរយ បើធៀបនឹងរយៈពេលដូចគ្នានៅឆ្នាំ២០១៧។ ក្រសួងរំពឹងថា កម្ពុជានឹងទទួលបានទេសចរអន្តរជាតិប្រមាណ ៦លាន ២សែននាក់(៦,២០០,០០០) នៅឆ្នាំ២០១៨ និងប្រមាណ ៧លាននាក់(៧,០០០,០០០) នៅឆ្នាំ២០២០ និងប្រមាណ ១៥លាននាក់ នៅឆ្នាំ២០៣០។
អ្នកនាំភ្ញៀវទេសចរដែលមានបទពិសោធន៍ប្រមាណ២០ឆ្នាំដដែល អះអាងថា កំណើនទេសចរនេះ ភាគច្រើនជនជាតិចិន ចំណែកអ្នកទេសចរអឺរ៉ុប ជប៉ុន និងសហរដ្ឋអាមេរិកជាដើម បានថយចុះ ហើយកំណើននេះមានតែអ្នកមានលុយ និងមានអំណាច និងក្រុមហ៊ុនទេសចរបរទេសទេ ដែលទទួលបានប្រាក់ចំណូលខ្ពស់ ព្រោះទេសចរចិន ភាគច្រើនមានក្រុមហ៊ុននាំទស្សនាផ្ដាច់មុខ ចំណែកឯពលរដ្ឋក្រីក្រ និងអ្នកប្រកបរបរតូចតាចនៅតំបន់ប្រាសាទអង្គរវត្តវិញ បានបោះបង់អាជីពរបស់ខ្លួនបណ្ដើរៗហើយ ដោយសារតែរកប្រាក់ចំណូលមិនបានដូចពេលមុនៗ៕ RFA Khmer, ចុចស្ដាប់សំឡេង
.jpg)
%20%E1%9E%8F%E1%9E%B6%E1%9E%98%E1%9E%80%E1%9E%B6%E1%9E%9A%E1%9E%94%E1%9E%94%E1%9E%BD%E1%9E%9B%E1%9E%9A%E1%9E%94%E1%9E%9F%E1%9F%8B%E1%9E%80%E1%9E%98%E1%9F%92%E1%9E%96%E1%9E%BB%E1%9E%87%E1%9E%B6%20(3).jpg)
ไม่มีความคิดเห็น:
แสดงความคิดเห็น