 |
| ខ្មែរនៅឯនាយសមុទ្រ បាននាំគ្នាធ្វើបាតុកម្ម តវ៉ានៅមុខការិយាល័យសិទ្ធិមនុស្សរបស់អង្គការសហប្រជាជាតិ នៅទីក្រុងហ្សឺណែវ ប្រទេសស្វ៊ីស ប្រឆាំងលោក ហ៊ុន សែន កាលពីថ្ងៃទី៣០ ខែមករា ឆ្នាំ២០១៩។ |
ប្រជាពលរដ្ឋខ្មែរនៅអឺរ៉ុបប្រកាសពីគម្រោងដឹកនាំធ្វើបាតុកម្មប្រឆាំងវត្តមានលោក ហ៊ុន សែន មេរបបភ្នំពេញ នៅពេលដែលលោកទៅចូលរួមកិច្ចប្រជុំពាក់ព័ន្ធនឹងយុទ្ធសាស្ត្រលើវិស័យពាណិជ្ជកម្មនៅទីក្រុងហ្សឺណែវ ប្រទេសស៊្វីស ដែលគ្រោងធ្វើនៅថ្ងៃទី៤ កក្កដាខាងមុខនេះ។ ស្របពេលជាមួយគ្នានេះមេដឹកនាំរបបក្រុងភ្នំពេញអះអាងថា លោកក៏មានពលរដ្ឋខ្មែរប្រមាណ ៧០០នាក់ រង់ចាំស្វាគមន៍លោកផងដែរ។
ប្រធានគណបក្សសង្គ្រោះជាតិប្រចាំទីក្រុងលីយ៉ុង (Lyon) ប្រទេសបារាំង លោក លី ពឿង ប្រាប់អាស៊ីសេរីកាលពីថ្ងៃទី១ កក្កដាថា ប្រជាពលរដ្ឋខ្មែរនៅបែកអឺរ៉ុបបានត្រៀមខ្លួនរួចហើយដើម្បីដឹកនាំធ្វើបាតុកម្មប្រឆាំងនឹងវត្តមានលោក ហ៊ុន សែន នៅក្រៅប្រទេស។
លោកបញ្ជាក់នៅក្នុងបទសម្ភាសន៍ជាមួយអាស៊ីសេរីថា ប្រជាពលរដ្ឋខ្មែរនៅក្រៅប្រទេសមិនពេញចិត្តនឹងវត្តមានលោក ហ៊ុន សែន នៅក្រៅប្រទេសទេ ដោយសារតែពួកគាត់មិនទទួលស្គាល់លោកជានាយករដ្ឋមន្ត្រីតំណាងឲ្យប្រទេសកម្ពុជានោះឡើយ។
លោកមានប្រសាសន៍បន្តថា អ្នកចូលរួមធ្វើបាតុកម្មទាំងអស់ នឹងចង់បង្ហាញអោយពិភពលោកបានដឹងដែរថា កម្ពុជាត្រូវការសេរីភាព ប្រជាធិបតេយ្យ គោរពសិទ្ធិមនុស្ស និងចង់ឱ្យគណបក្សសង្គ្រោះជាតិ ដែលជាបក្សប្រឆាំងដ៏មានឥទ្ធិពលបានចូលរួមបោះឆ្នោតឡើងវិញ៖ «សុខចិត្តទ្រាំធ្មេចភ្នែក យើងឈរដូចគេដូចឯងអ៊ីចឹងតាមអ្វីដែលយើងអាចធ្វើបាន។ យើងមិនបណ្ដោយអោយ ហ៊ុន សែន ទៅសប្បាយ តាមអំពើចិត្តហើយដើរអួតថា ៧០០នាក់។គេទៅច្រើនគ្នាហើយសប្បាយចំពោះលោកទេ គាត់ច្រឡំធំហើយ ច្រឡំធំមែនទែនតែម្ដង បាទ»។
មេដឹកនាំរបបក្រុងភ្នំពេញគឺលោក ហ៊ុន សែន គ្រោងនឹងដឹកនាំគណៈប្រតិភូទៅចូលរួមប្រជុំមួយពាក់ព័ន្ធនឹងយុទ្ធសាស្ត្រលើវិស័យពាណិជ្ជកម្មនៅទីក្រុងហ្សឺណែវ ប្រទេសស្វីស ដែលគ្រោងធ្វើនៅថ្ងៃទី៤ កក្កដាខាងមុខនេះ។
ប្រជាពលរដ្ឋខ្មែរនៅក្រៅប្រទេសប្រកាសអំពីផែនការបាតុកម្មប្រឆាំងនឹងវត្តមានលោក ហ៊ុន សែន នៅលើទឹកដីអឺរ៉ុបនេះ បានធ្វើឡើងជាហូរហែរួចមកហើយ នៅពេលដែលលោក ហ៊ុន សែន ចេញមកចូលរួមកិច្ចប្រជុំក្រៅប្រទេសម្តងៗ។
ចំណែក លោក ហ៊ុន សែន វិញ ប្រកាសថា ទោះជាមានបាតុកម្មប្រឆាំងវត្តមានលោកយ៉ាងណាក៏ដោយ ហើយបើទោះជាត្រូវឡើងភ្នំភ្លើង ក៏លោកនៅតែទៅចូលរួមកិច្ចប្រជុំនៅទីក្រុងហ្សឺណែវ ប្រទេសស៊្វីសនោះដែរ ហើយលោកថែមទាំងថ្លែងចំអកឲ្យក្រុមប្រឆាំងថាសូមចេញមុខមកឲ្យបានច្រើន ដើម្បីតទល់នឹងក្រុមដែលគេមកគាំទ្រលោក៖ «ខ្ញុំមិនដឹងថា មានបាតុកម្មប្រឆាំងនឹងខ្ញុំ ឬអត់តែបើទោះបីជាឡើងភ្នំភ្លើងក៏ខ្ញុំទៅហ្សឺណែវដែរ ម៉ោង ៤ល្ងាច នៅថ្ងៃទី៤ ខ្ញុំនឹងជួបជាមួយនឹងពលរដ្ឋខ្មែរប្រមាណ ៧០០នាក់ កន្លែងក៏ពិបាក ពីព្រោះចំថ្ងៃធ្វើការ ហើយខ្ញុំជួបពួកនិស្សិតនឹងពលរដ្ឋខ្មែរយើងរស់នៅអឺរ៉ុបប្រមាណ ៧០០នាក់»។
គម្រោងដឹកនាំធ្វើបាតុកម្មរបស់ពលរដ្ឋខ្មែរនៅលើទឹកដីអឺរ៉ុបលើកនេះខុសប្លែកពីលើមុនៗបើទោះបីជាមេដឹករបបក្រុងភ្នំពេញបានអះអាងថា អ្នកដែលបានមកធ្វើបាតុកម្មប្រឆាំងនឹងវត្តមានលោកនៅក្រៅប្រទេសមានចំនួនតិចជាងអ្នកដែលមកស្វាគមន៍វត្តមានរបស់ក្តី។
ប្រធានគណបក្សសង្គ្រោះជាតិប្រចាំទីក្រុងលីយ៉ុងប្រទេសបារាំង លោក លី ពឿង ចោទប្រកាន់ថា របបក្រុងភ្នំពេញបានផ្ដល់ថវិកាប្រមាណ ១០០ដុល្លារដល់ពលរដ្ឋខ្មែរណាដែលមកគាំទ្រលោក ហ៊ុន សែន ទាំងការធ្វើដំណើរ និងស្នាក់នៅដោយមិនគិតថ្លៃនៅទឹកដីអឺរ៉ុបផងដែរ។
លោកបញ្ជាក់ថា មានមនុស្សចំនួនបីប្រភេទ ដែលធ្លាប់ស្វាគមន៍វត្តមានលោក ហ៊ុន សែន កន្លងមក គឺទីមួយនិស្សិតដែលទទួលបានអាហារូបករណ៍មកបន្តការសិក្សានៅក្រៅប្រទេស ទីពីរអ្នកដែលមានមុខរបររកស៊ីចេញចូលស្រុកខ្មែរ និងទីបី សាខាគណបក្សប្រជាជនកម្ពុជានៅក្រៅប្រទេស។ តែទោះយ៉ាងណា លោកបញ្ជាក់ថា មានពលរដ្ឋខ្មែរនៅក្រៅប្រទេសច្រើនលើសលប់ មិនគាំទ្រលោក ហ៊ុន សែន ទេ។
កាលពីខែឧសភាពលរដ្ឋខ្មែរជាច្រើននាក់បានដឹកនាំធ្វើបាតុកម្មប្រឆាំងនឹងវត្តមានលោក ហ៊ុន សែន នៅក្នុងទីក្រុងតូក្យូប្រទេសជប៉ុនជាទីកន្លែងដែលលោក កំពុងចូលរួមសន្និសីទអន្តរជាតិលើកទី២៥ ស្ដីពីអនាគតរបស់អាស៊ី។
មេដឹកនាំរបបក្រុងភ្នំពេញលោក ហ៊ុន សែន មិនបានចេញមុខទៅជួបក្រុមបាតុករ ដែលប្រឆាំងនឹងលោកនោះទេ ប៉ុន្តែលោកបានថ្លែងនៅក្នុងសន្និសីទអន្តរជាតិលើកទី២៥ ស្ដីពីអនាគតរបស់អាស៊ីនៅទីក្រុងតូក្យូថា លោកមិនខ្លាចញញើត ចំពោះបាតុកម្ម ឬការប៉ះបោរប្រឆាំងលោកនៅក្រៅប្រទេសនោះទេ។
ប្រជាពលរដ្ឋខ្មែរនៅក្រៅប្រទេស ដែលរួមមានសហរដ្ឋអាមេរិក បារាំង និងប្រទេសជប៉ុនតែងតែដឹកនាំធ្វើបាតុកម្មប្រឆាំងវត្តមានមេដឹកនាំរបបក្រុងភ្នំពេញហើយក៏មានពលរដ្ឋខ្មែរមួយចំនួន ក៏ស្វាគមន៍លោក ហ៊ុន សែនផងដែរ៕ អាស៊ីសេរី, ចុចស្ដាប់សំឡេង
.jpg)
%20%E1%9E%8F%E1%9E%B6%E1%9E%98%E1%9E%80%E1%9E%B6%E1%9E%9A%E1%9E%94%E1%9E%94%E1%9E%BD%E1%9E%9B%E1%9E%9A%E1%9E%94%E1%9E%9F%E1%9F%8B%E1%9E%80%E1%9E%98%E1%9F%92%E1%9E%96%E1%9E%BB%E1%9E%87%E1%9E%B6%20(3).jpg)
ไม่มีความคิดเห็น:
แสดงความคิดเห็น